Kaka Dens Kuswandi

Mustika ati  anu teu kungsi pasini. Kembang malati anu ngan ukur ka ambeu seungitna. Anjeun ibarat ibun nu ngabaseuhan diri anu keur meunang halodo panjang. Kuring anu geus tuman hanaang, tumaninah dina poe anu mentrang. Tapi anjeun datang ngan ibarat girimis anu teu matak lantis. Beueusna hate kuring ngan ukur nambahan halabhab dina diri. Lain teu perlu, Tapi hampura kuring kudu ngajurung laku. Pangjurung anu dasarna lain ku tega, lain oge ku kangewa, tapi kuring rempan. Rempan kuring gumantung kana tiisna asih salira. Rempan kuring teu bisa jauh tina keclak katresna anu teu bisa di piboga

Oleh: Kaka Dens Kuswandi. ------------------------------------ Lain baseuh ku girimis, tapi keclakna cimata anu matak beueus, Komara sirna ku raray alum anu miyuni mega hideung. Lelembutan kumalayang di undeur katineung. Batin  ngoleang kabandang kamelang, Hate ka iwat duriat anu pamohalan bakal kahontal. Naha manganeuh meulit kana kembang beubeureuh? Naha kadaka kalah mapaes tohaga na tangkal katresna? Hiliwir angin peuting anu sumanding. Matak keueung lamun datangna bareng jeung mega hideung. Teu tega ranggeuyan carita ka irig angin. Baluas talaga kanyaah leah ku kiruh cai caah. KUDU KUMAHA? Balaka ngan bakal jadi mamala. Tapi di sidem ge kalah kamalangkem. Duh gusti, enggal angkir abdi ngadeuheus salira ka alam baka. Teu kiat iyeu raga midangdam kanyaah anu salah.

  Katresna lain dosa, ka cinta lain supata. Tapi naha rasa teh buah na ngan ukur cimata? Lain adigung, lain poho kana purwadaksina. Tapi iyeu rasa medalna ku nyalira.  Rasa anu teu boga mangsa, naon atuh dagoaneun nana?  lir ibarat jaladri anu tanpa tepi, lir ibarat gunung tanpa tutugan.  Anjeun ngan saukur ibarat isuk anu mawa ibun sakeclak, ngan ukur nyirungan katineung anu ngahaja rek di singlar.  Kiwari rundayan katineung rek dipapalerkeun, bongan mawa eurih nu ngageuri peurih kana ati, ngabudalkeun kingkin jeung rambisakna rasa. Pileuleuyan, hampura kuring rek miang, bongan da iyeu rasa teh ngan saukur kanyaah anu teu munasabah. Sumedang, 15 Juli 2022